Fem meritterte undervisarar

Å bli merittert undervisar er ei anerkjenning av undervisningspraksisen til den enkelte over tid. Ordninga skal fremme utdanningskvalitet gjennom å gi fagleg tilsette anerkjenning for dokumenterte resultat. Vidare skal ho stimulere til auka undervisningsinnsats og løne viktig undervisningskompetanse og utviklingsarbeid.

Etter søknadsfristen i desember 2024 er det no klart at dei nye titlane går til:

• John Vinge (førsteamanuensis i musikkpedagogikk og fagseksjonsleder for musikkpedagogikk og musikkterapi)
• Kristin Kjølberg (førsteamanuensis i musikkpedagogikk)
• Signe Kalsnes (dosent i musikkpedagogikk)
• Anne Katrine Bergby (førstelektor i gehørtrening)
• Gjertrud Pedersen (førsteamanuensis i musikkhistorie)

Les meir om merittering her. (ansatt.nmh.no)

Dette er første gong undervisarar på Noregs musikkhøgskole får merittering. Alle fem har vore tilsette på NMH i ei årrekke, og fleire har også vore stipendiatar i forkant.

– Eg er stolt av å kunne dele ut dei første meritteringane i historia til NMH. Alle dei fem undervisarane er høgt kompetente, samarbeidsorienterte og nytenkjande lærarar. Dei fortener verkeleg utmerkinga, seier rektor Astrid Kvalbein.

Eigarskap og utvikling

Førsteamanuensis Kristin Kjølberg ser fram til tida som kjem.

– For meg betyr dette at eg kan bidra enda meir i fagutviklinga på NMH. Eg gleder meg til å samarbeide med andre kollegaer som brenn for undervisning, og eg ønsker å bidra med både kreativitet og systematikk – slik at undervisninga på NMH blir videreutvikla i tråd med studentane og musikklivet sine behov, seier ho.

– Det kan innebere varierte læringsformer og undervisningsmetodar slik at studentane utviklar større eigarskap til eiga musikkfagleg utvikling.